Ngāpeke

He kaha hoki ngā pānga whakapapa o Ngāti Pūkenga ki a Ngāti Hē, hapū o Ngāi Te Rangi o Tauranga. Ka tono a Ngāti Hē kia tautokona e Ngāti Pūkenga ki te whawhai ki tētehi atu hapū o Ngāi Te Rangi ki Matapihi. Ka whakaae a Ngāti Pūkenga.

Hei utu mō te tautoko a Ngāti Pūkenga, ka takoha a Ngāti Hē i ngā whenua o Ngāpeke ki a Ngāti Pūkenga. Ka noho hoki tēnei hei paenga whenua i waenga i a Ngāti Hē me Ngā Pōtiki, i taukumekume rā i taua wā.