Reo

E kīia nei te ahurea tuku iho o ngā iwi Māori he ahurea ā-waha, arā kāore ngā kōrero i tuhia iho ki te kupu kia ū ai, kia mau ai, kia tūturu ai. He huhua ngā ahurea ā-iwi o te ao i pērā rā i roto i te takahanga o ngā tau, o ngā rautau hoki. 

He nui ngā āhuatanga a wēnei tū ahurea hei whakapūmau i ngā kōrero tuku iho, i ngā mātauranga, i ngā māramatanga, i ngā mātāpono, i ngā aha, i ngā aha. Ko ētehi ko te pakiwaitara, ko te karakia, ko te tauparapara, ko te whakapapa, ko te whakataukī, ko te aha, ko te aha, ā tatū noa mai ki te waiata. 

Ko te waiata he mea waihanga nā te ngākau auaha, he rangi rōreka hei whakakākahu i ngā whakaaro, hei kawe hoki i ngā kōrero i whakaaro nuitia ai e te kaitito. Kei roto i ngā waiata e takoto ana ngā tātai kōrero, te mamae, te koa, te aroha, te mauāhara, te riri, te pōuri me te rangimārie, tae atu ki ngā āhuatanga o runga ake nei.