"He paruparu ngā kai, he taniwha ngā tāngata."
A Whakataukī / Whakatauākī reo
He paruparu ngā kai, he taniwha ngā tāngata."
I te kākarauritanga o te atapō, ka whakaeke haere te hoariri, ka titiro whakamuri, ka kite kāore rātau i whāia. E kaikai kau ana a Ngāti Pūkenga i ngā titiko e hora ana i te oneone. Nā, ko te rite ia ko te taniwha e kai ana i te oneone o te tāhuna.
He Whakaari anō:
E ai ki te rangatira nei, ki a Hone Ōhia, ehara tēnei i te kōrero mō Ngāti Pūkenga.
“Nā ko te kōrero nei nā Te Waharoa i kōrerotia ki Te Tokitoki. I tērā wā e rua ngā pā o Ngā Pōtiki. Ko tētehi wāhanga o Ngā Pōtiki i Te Tokitoki, ko tētehi wāhanga i Ōhotutaihi. Ko te wāhanga i Te Tokitoki ko Ngāti Hē. Ko tērā wāhanga i noho ki Ōhotutaihi ko Ngāti Mateika. Nō reira, nō Ngāti Hē kē tēnā whakataukī.
Nā i kī ahau kua marara kē a Ngāti Pūkenga. Nō muri kē nei ka hoki mai anō a Ngāti Pūkenga ki Tauranga. Nā ko te tangata i hoki mai ko Paroto. Te tangata tuatahi i haere ai ia ki te tono whenua mōna, ko Taharangi. Kāti ko Taharangi kei te mahara tonu pea ki ngā mahi a Ngāti Pūkenga ki a Ngāi Te Rangi, nō reira te whakahoki a Taharangi ki te tono a Paroto,
Ka haere kē mai koe ki au
He whenua tonu tōu kei Te Waerenga
Otirā kāore a Paroto i pīrangi ki Rotorua. Nō reira ka haere ia ki a Taipari, ā, tae tonu a Taipari ka hoatu ko te whenua e mōhiotia nei i naianei ko Ngāpeke. Te rohe o tēnā whenua, i tīmat amai i te awa o Waitao, ka rere tika iho i te rohe o Waitaha poraka, ā, tae noa ki te repo o Ōtāwhao, nā, ka whai i te repo puta noa ki te tāhuna e kīia nei ko Rangataua.”
- Hone Ohia