Te waka o Mata-atua
A kōrero nō te Te Tua Whakatere wā
Ka whakaterea atu i te oneone o Ma’uke te waka i tāraia e Irakewa mā.
Ko ētehi o ngā tāngata o runga ko Tāneatua rātau ko Toroa me āna wāhine, ko Muriwai, ko Wairaka.
I runga hoki a Tama-ki-hikurangi i te waka, me āna kao mā tōna iwi kei Kākahoroa.
(Tirohia te kōrero o Hoaki rāua ko Taukata)
Nā te tapatahi o te hāpai o te hoe i pai ai te whakawhiti i te moana nui, ā, katoa katoa rātau i whai mahi, i whai wāhi.
Toroa - Rangatira
Puhi - Rangatira
Tāneatua - Tohunga Ihorae
Tama-ki-hikurangi - Tohunga Tātai Arorangi
Muriwai - Ruahine
I te whakamāunutanga o te waka, ka tapaina ko Te Tua Matua o Irakewa.
Ka haere, ka haere, ā, ka tae atu ki Te Motu-tapu-a-Tinirau kei te taha rāwhiti o Rarotonga. Ka tūtakina ki reira ōna huānga nō runga i ētehi atu waka pēnei me Te Arawa, ko ngā rangatira o runga ko ngā māhanga nei, ko Tia rāua ko Hei.
Ka tere atu te tāruru ki Aotearoa.
Kīhai te hunga o runga o Te Tua Matua i mōhio, e raruraru ana te waka Te Arawa. Me te aha ka whakaarangia ngā atua e tā Toroa irāmutu kei runga o Te Arawa, e Ngātoroirangi, ā, ka karawhiua rātau e te āwhā kikino.
Ka oho ake te taniwha nui o te moana, a Te Parata, ka ngongo i ngā wai o runga ake i a ia, ka hua ake he ripo nunui. Ka kīia ko Te Korokoro o Te Parata.
He huhua ngā waka i mau i te āwhā nei, tae atu ki Te Tua Matua.
Ka takina e te tohunga nui, e Toroa, tāna karakia, ka ora te waka i te mate nui. Ka rerewhatia e ngā hau ngā rā o te waka, ka hūtia ake te waka i te waha o Te Parata. Kīhai i pēnei te waimārie o ētehi.
Hei tā ētehi whatinga o te kōrero nei, ka pākarukaru Te Tua Matua, ka mate ki te hoki ki uta, whakatikatikaina ai. Hei tā ētehi, i hoki ki Te Motu-tapu-a-Tinirau, hei tā ētehi i pae ki Rangitāhuahua.
Ka whakaterea anō te waka, ka tapaina ko Mata-atua hei whakamaharatanga ki te mate nui nei.
Hei tā tētehi whatinga o te kōrero, ko te takenga o te ingoa nei ko te kitenga a Toroa i te mata o tētehi atua i mua i te whakaoranga o te waka i te āwhā. Kāore e whakamāramatia ko tēhea atu.
Hei tā tētehi atu whatinga o te kōrero, ka kumea iho te ihu o te waka ki roto ki te ripo, ka kite ngā kaumoana i te ‘mata’ o te atua i waenganui pū i te ripo.
Kātahi a Mata-atua ka tere ki Aotearoa, ka ū ki te raki o Te Tara o te Ika, ki Repanga rā anō.